Pulong Binisaya | Bisaya ni Bai!

Kini usa ka espesyal nga salmot akong dalit alang sa mga Bisaya og sa mga gihidlaw pagbasa ug paminaw niining atong pinulongan.

Usa ka isig manunuwat ang nakapa agni kanako nga magsuwat gamit ang atong Binisaya nga pulong. Ang akong inspirasyon atong taguon sa pangalan nga “TheGirl” o “AngBabaye”. Sama kanako, usa siya ka manunuwat, apan talagsaon ang iyang mga salmot. Kasagaran niini mga balak nga sa kasing-kasing mokumot gayud. Ayaw kalimot pagbisita sa iyahang pahina pagkahuman nimo pagbasa aniang akoang salmot usab.

BISAYA? Kaantigo ka pa ba?

Makasabot ka pa ba kung imong ka-istorya ang gigamit mao kining pinulongana? Sa akong bahin… malisod gayud. Ako mismo moangkon, malisod. Ngano ba? Sa panahon karon, ang pulong nga banyaga mao ang sayon nga malitok sa atong mga ba-ba.

Sa atong mga tulunghaan, sa ako nagatungha pa, pa Inglison man gayud mi sa among mga maestra. Nahinumduman ko pa, kung kami masakpan nga binisaya ang pinulongan, pamultahon kami ug tag-piso. Intawn ang among bawon nga singko ayawat dili makuhaan kay magpalit pa ra ba intawn mi ug sud-an nga tag dos sa tindahan, maningkamot intawn nga dili masakpan. Kung magkalisod dili na lang gayud mi motabi aron dili makabayad ug dili mi magutman.

Sa ako nahuman na, panahon nga mangita ug trabaho. Aguy, ang interbiyo Inglis man sad ang utro. Tungod ako intawn naningkamot nga makasulod kay akong ginikanan mao ray gipaabot, bahala na ug binayabas akong Inglis ang importante madawat lang gayud aron dili sayang ang paningkamot sa akong ginikanan.

Ug tungod lage kay ang trabaho nga nasudlan kining banyagang pinulongan man ang puhunan. Wala na gayud akoy mahimo kung dili kada adlaw mag Ininglis. Unyag uli sa balay ako intawn malipay kay akong utok makapahuway. Apan akong kapikas sa kinabuhi sa telebisyon nagtan-aw, salida nga giulohan ug “Logan”, aguy Ininglis ra gihapon ang akong nadunggan.

Bitaw, komedya ra! Salamat Google Images.

Talagsaon nalang gayud karon nga makabasa ka ug salmot nga ingon ani ang pulong. Maong sa pagbasa ko pagbalik niining akong dalit, ako nakapahiyom. Matahom gayud pulungon kining Binisaya nga talagsa nalang nato madunggan ilabi na sa kadalanan. Usa sa akong amiga gipasuway ko pagbasa, pero wala niya tiwasa kay lage “Lahi ra!”

Nganong ang uban lud-on kung maminaw ug magbasa ug ingon ani nga pulong? Wala ba si sila nasayod nga mao kini sa kaniadto ang puhunan sa atong mga apohan kung sila mobirig sa babaye nga ilang naibgan?  Akong Lola, sa siya buhi pa, dili gayod maluya ug balik-balik kung gi unsa siya pagdiga sa akong Lolo nga kursunado. Sa balak ra siya gidaog kay kuno iyang kasing-kasing daw gilabyog-labyog.

Karon, kay ikaw man gayod gabasa, bilini ko ug gamayng pulong. Atong suwayan pag bangon kining pulong nga Binisaya nga atong gilubong sa kagahapon. Ug diay ako mapasalamaton nga ikaw nihuman hangtud diri sa katapusan niining akong salmot. Sa imong komento ako magpaabot.

Hangtod sa sunod!

Bangon Bisaya!!!